Go‘zal Turkiston
0:00
/
Toshkent
temperature icon 9°C

TAVSIYA QILAMIZ


30.09.2025 | 16:23

img205

“СЕНИНГ БИЛАН ЭСКИЛАР ЯНГИ…”

МУАЛЛИМ

Одамтоғлар бордир, одамдарёлар –
Дунёни етаклаб юрган дунёлар.

Илк ҳаёт китобин ёзган улардир,
Махлуқдан Инсонни тузган улардир.

Улардир минг йиллик зулмат йўлидан
Ўтган авлодларнинг тутиб қўлидан.

Кўз нурини бериб ҳам бериб жонин,
Кўзларини очган сўқир дунёнинг.

Илк ҳарфда коинот калитин топган,
Илк сўз-ла жаҳолат йўлини ёпган.

Ёнидан киборлар ўтса валақлаб,
Улар сукут қилган китоб варақлаб.

Тупроқдай хокисор, сувдай ҳаётбахш,
Йўлсизларга йўлбахш, элга муродбахш.

Олам ўз нурини йўқотса агар,
Муаллим юзидан топар муқаррар.

БАҲОР. ҒОЛИБЛАР

Майсага дўқ қилар момақалдироқ,
Ғунчага чақчаяр ғазабнок чақмоқ.

Қасирға забтидан қораяр дала,
Булут йиртиғидан тўкилар жала.

Майса парво қилмай ўсаверади,
Ғунча оқ кулгулар сочаверади.

Хавф ўтгач, нурланиб ёришар само
Табассум қилгандай уларга Худо.

МАЪЮС ГУЛ

Бир меҳрибон аёл бу маъюс гулни
Ҳалол манглай тери билан ўстирган.

Япроқларин аччиқ кўзёшлар билан
Ҳар кун ювиб-тараб парвариш қилган.

Бир ҳасратли аёл, муштипар аёл
Фақат шу гулни деб йиғлаган, кулган.

Бир ҳокисор аёл бу маъсум гулни
Қақраган йилларда, қаттиқ кунларда
Юрак қони билан сувлаб ўстирган.

Бир ҳўкиз топтаётган бу гулни…

ДЎСТ

Менинг эски дўстим, навқирон дўстим,
Фаришта чеҳрали, фаровон дўстим.

Шаҳри издиҳомда ёлғиз сирдошим,
Гоҳо бобомдайсан, гоҳо тенгдошим.

Сенинг ҳузурингда ҳузур топаман,
Яхши-ёмонимга узр топаман.

Ҳушимни, тушимни айтаман сенга,
Ҳар кун юрак билан қайтаман сенга,

Кўнглимга мендан-да жондай яқин Сув,
Менинг шоир дўстим, катта оқин Сув.

АПРЕЛЬ

Мунча чулдирайсан, мунча куласан,
Сувлардай шарқираб, шошиб еласан.
Оппоқ булутлардай кезасан яйраб,
Тонгни уйғотасан қушлардай сайраб.

Шиддатинг тошқинли, илҳоминг-да – сел,
Қишдан чиққан боғдай куласан Апрель.

Мен эса йилидан адашган меҳмон –
Қари декабрдай қошингда ҳайрон.

ҲОЛ

Жонда ман найсондаман, хазондаман,
Танда ман инсондаман, ҳайвондаман.

Шонда ман нишондаман, бешондаман,
Онда ман хуш ондаман, пушмондаман.

Қонда ман, қурбондаман, омондаман,
Онгда ман, шайтондаман, имондаман.

Тонгда ман, хуфтондаман, хўп тонгдаман,
Кунда ман карвондаман, зиндондаман.

Бунда ман ҳар ёндаман, ҳайрондаман,
Унда ман қай ондаман, қай ёндаман?

Бунда ман ҳайрондаман, ҳайрондаман.

САРАТОНДА

Ям-яшил, кенг дала бошида,
Бир ариқ зилол сув қошида
Беш-олти тол қур-давра қурган,
Соясида мункайиб турган

Бир чайла кўриб қолдим,
Сўнг хийла туриб қолдим.
Чайлада бир келинчак,
Тебратади беланчак.
Алласига алданиб,
Гўдак эснар эринчак.

Юз қаватли улкан бинолар,
Очкўз, бадбахт, кибор дунёлар
Шу чайлага саломга келса,
Бахт нелигин англаса – билса…

Жаҳоннинг йўқотган бахтини,
Нотинч дунё тинчи нақдини,
Шу кичик чайлада кўрдим мен,
Ўйга толиб узоқ турдим мен:

Чайлада бир келинчак,
Тебратади беланчак,
Алласига алданиб
Қуёш эснар эринчак.

* * *
Сен ҳақингда ўйласам,
кичраяди дунёлар,
Назаримга йўлолмас
фитна-фасод, иғволар.

Сен ҳақингда ўйласам,
кўнглим кенгайиб борар,
Изтиробим гуллайди,
севгим улғайиб борар.

Сен ҳақингда ўйласам,
очиб кўнгил кўзимни,
Худонинг ҳузурида
Инсон сезгум ўзимни.

ТОҒДА

Арчазор оралаб келган бир Шамол
Қоялар ортида, овлоқда кезган
Соҳибжамол Хаёл ҳақида куйлар…

Даралар оралаб шарқираган Сув
Ҳайқириб шеър айтар ёш шоир каби.

Тунда тоғ бошида ярқираган Ой
Етаклаб борарди болалигимни.

Шошилиб юксакка кетаётган Йўл
Эргаштириб ўтди ҳорғин умримни.

Худо нафасидай мусаффо Ҳаво
Илк севгим тотини эсимга солди.

Чўққи бошидаги парча оқ Булут
Биринчи мактубим сингари тоза.

Чўққилардан эниб келаётган Шом
Онам нигоҳидай ғамгин, умидвор…

ХИЁНАТ

Тўқайда дуч келдим чиябўрига
Қонсираб, ҳансираб топгани – хўрлик.
Ҳол сўрсам, гап ташлаб нари-беридан,
“Мен ҳам одам эдим”, – деди у шўрлик.

Кўҳна гўрхонада кўрдим бир илон,
Ўрмалар, судралар, қийшанглар турлик.
Ҳол сўрсам, бошини кўтариб нолон:
“Мен ҳам одам эдим”, – деди у шўрлик.

Вайроналар ичра бойўғли учрар
Улфати зулматдир, аъмоли – зўрлик.
Ҳол сўрсам, кўзидан аланга сачраб,
“Мен ҳам одам эдим”, – деди у шўрлик.

Одам имзосида манглайда хатлар,
Юз бурма виждон-у диёнатлардан,
Пайдо бўлар эмиш бундай бадбахтлар
Худо ва Инсонга хиёнатлардан.

* * * 

Дилбар хаёл, шаробингни тут,
Оғирлашар кўҳна изтироб…
Неча йилки, туйғулар унут,
Ғариблашган юрагим хуноб.

Дилбар хаёл, ҳаётдан сўйла,
Зерикарли ўлим гурунги.
Севгиларни ўтганмиз бўйлаб,
Сенинг билан эскилар янги.

Дилбар хаёл, шаробингни тут.

АНДИША

Мунчалар маъюссан синглим, Андиша,
Ғамгин кўзларингда маржон-маржон ёш.
Лабларинг пирпираб турар ҳамиша,
Ўнг ёнингда тош-у сўл ёнингда тош.

Шамолдаги шамдай титраб турасан,
Маъсума кўнглингда оташин оҳлар.
Билмам, қай меҳробга бошинг урасан,
Ортингда таъқиблар, олдингда чоҳлар.

Тегрангда ириллар тишларин қайраб,
Замон бўрилари, нафс тулкилари.
Бошингда ёйилар қарғадай сайраб
Разил кимсаларнинг кўр кулкилари.

Талотумлар ичра қалбга йўл олган,
Қайғули йўлдоши Ҳаёнинг сенсан.
Сўнгги илинж каби дунёда қолган,
Маъюс фариштаси Худонинг сенсан.

Ай, кўнглим синглиси, виждон оғриғи,
Ўзи ҳимоясиз ҳимоям сенсан.
Қўлингда титрайди имон ёрлиғи,
Дунё англай олмас ҳикоям сенсан.

ТЎДА

Бу тўда ҳолидан куйинма, жигар,
Дардинг увол кетар, англамас биров.
Найни ит олдига ташласанг агар,
Суяк деб ғажишга тушади дарров.

ЭСКИ ДАРС       

Ит олдида тиз чўккан
Норлар тилга кирганда,
Ёзда бошларга ёққан
Қорлар тилга кирганда,
Бирдан йўққа айланган
Борлар тилга кирганда,
Ёрдан ёвга эврилган
Зорлар тилга кирганда,
Жон томирдай узилган
Торлар тилга кирганда,
Минг йил ғазна қўриган
Морлар тилга кирганда,
Шамоллар тутқун ётган
Ғорлар тилга кирганда,
Атиргулдай гуллаган
Хорлар тилга кирганда,
Дунё рост бўлармиди,
Ёлғон оз бўлармиди,
Қарға битта думалаб,
Оппоқ ғоз бўлармиди?..

ОЙДИН НИГОҲ

Қаҳрим келганида, қаҳримни ёйдим,
Менинг зулматимга боқардинг ойдин.

Заҳрим келганида, заҳримни ёйдим,
Тағин ғурбатимга қарардинг ойдин.

Меҳрим келганида, меҳримни ёйдим
Сен яна боқасан ойдиндан-ойдин.

Эшқобил ШУКУР

“Жадид” газетасининг 2025 йил 26 сентябрдаги 39-сонида


ЎЗИ УСТОЗ БЎЛАР УСТОЗ КЎРГАНЛАР

“– Мени танимадингизми, ахир мен фалончи блогерман!– Узр, қайси ном билан қандай мавзуларда блог юритасиз?– Барча мавзуда. Интернетда ҳамма “Ҳаққуш” номи билан билади мени.– Шунақами? Мен билган кўпгина блогерлар аниқ бир йўналиш бўйича фаолият юритади.– Улар менга ўхшаб кўп соҳани тушунмайди-да, шунинг учун биттаси билан чекланади.– Қайси соҳа бўйича мутахассиссиз?– Олий маълумотим йўқ. Мактабни битирганман”. […]

21.01.2026 | 15:59

img830

МАТЕМАТИКА – МУВАФФАҚИЯТ МАНБАИ

Суҳбатдошимиз Ўзбекистон Фанлар академияси ва Бутунжаҳон Фанлар академияси академиги, Давлат мукофоти лауреати Ўткир Розиқов айни пайтда ЎзФА В.И.Романовский номидаги Математика институти директори ўринбосари сифатида фаолият олиб бормоқда. У қарийб қирқ йиллик фаолияти давомида математик анализ, алгебра ва эҳтимоллар назариясининг замонавий усуллари билан физик ва биологик системаларнинг термодинамикаси ва динамикаси назарияларини яратиб, уларни табиий фанларга қўллашда […]

21.01.2026 | 12:50

img823

ОҒАМИЗ ОМОН БЎЛСИНЛАР!

Мен Муродбой Низанов билан илк бор 2004 йилда танишганман… Йўқ, адашдим. Бу инсонни анча аввалроқ, ўспирин чоғларимда истеъдодли ижодкор сифатида таниганман. Мактабда ўқиб юрган пайтларимда адабиётга ҳавасим баланд эди. Қўлимга тушган китоб ва газета-журналларни иштиёқ билан мутолаа қиламан. Колхозда бригадир бўлиб ишлайдиган раҳматли амаким ўзи обуна бўлган “Ёшлик”, “Шарқ юлдузи”, “Муштум” журналларини ўқиб бўлгач, менга […]

21.01.2026 | 09:47

img859