13.04.2024 | 09:55
470
BARCHAMIZ VATAN HIMOYACHISI,TINCHLIK POSBONI BO‘LISHIMIZ ZARUR

Yoshlarni harbiy kasbga yo‘naltirish, Vatan himoyasiga har doim shay turadigan yovqur askar qilib tarbiyalashda adabiyotning, kitobxonlikning alohida o‘rni bor. Shu maqsadda O‘zbekiston Yozuvchilar uyushmasi va Qurolli Kuchlar tarkibidagi barcha tuzilmalar o‘rtasida mustahkam hamkorlik o‘rnatilgan. Ma’naviyat kechalari, kitobxonlik tadbirlari va tanlovlari, kitob taqdimotlari, ijodiy uchrashuvlar muntazam tashkil etilmoqda.
Ma’lumki, mamlakat taqdiri millat ma’naviyati bilan chambarchas bog‘liq eng muhim masaladir. Vatan tinchligiga daxldorlik tuyg‘usini chuqurroq his etish, ta’bir joiz bo‘lsa, yurt daxlsizligini yurakning tub-tubigacha singdirmoq kerak. Sarhadlarimizni qo‘riqlayotgan askar o‘g‘lonlarimiz yuragiga shunday ma’naviy quvvat beraylikki, ular bajarayotgan vazifalariga shunchaki faqat harbiy xizmat deb qaramasinlar. Ularning qalbida ona Vatan tuprog‘ini asramoqning yuksak sharafi o‘chmas olovga aylansin.
Prezidentimiz tashabbusi bilan 2023-yilda Yozuvchilar uyushmasi tomonidan Mudofaa vazirligi hamda boshqa hamkor tashkilotlar bilan birgalikda “Mard askarga sovg‘a” turkumida ixcham kitoblarni nashr etish yo‘lga qo‘yilgan edi. Bu kitoblar ilk bora 11 nomda nashrga tayyorlanib, 35 ming nusxada chop etilib, barcha harbiy qismlar va okruglar, harbiy ta’lim muassasalariga yetkazildi. Shundan so‘ng “Mard askarga sovg‘a” loyihasini muntazam davom ettirish rejalashtirildi. Shu munosabat bilan 2024-yilda ushbu turkumda yana 7 nomdagi kitob nashrga tayyorlandi.
Harbiylar hatto jismoniy va harbiy tayyorgarlik vaqtlarida ham bunday ixcham kitoblarni yonida olib yurib, mutolaa qilish imkoniga ega.
Kuni kecha O‘zbekiston Respublikasi Qurolli Kuchlari akademiyasida ushbu turkum kitoblar taqdimoti o‘tkazildi. Unda Mudofaa vazirligi mas’ul xodimlari, harbiy xizmatchilar, harbiy ta’lim muassasalari va “Temurbeklar maktablari” kursantlari, muddatli harbiy xizmatchilar, Mudofaa vazirligi huzuridagi Jamoatchilik kengashi a’zolari, faxriylar, taniqli shoir va yozuvchilar, san’atkorlar ishtirok etdi. Taqdimot jarayonini videokonferens-aloqa tizimi orqali Mudofaa vazirligining tegishli harbiy okruglari xizmatchilari ham onlayn tomosha qilishdi.
Anjumanda O‘zbekiston Respublikasi Prezidentining maslahatchisi Xayriddin Sultonov, O‘zbekiston Respublikasi Mudofaa vaziri, general-leytenant Bahodir Qurbonov, O‘zbekiston Yozuvchilar uyushmasi raisi, O‘zbekiston xalq shoiri Sirojiddin Sayyid, O‘zbekiston Kinematografiya agentligi Bosh direktorining birinchi o‘rinbosari Shuhrat Rizayev va boshqalar so‘zga chiqdi. Askarlar va kursantlar doim yonida olib yuradigan bunday cho‘ntak kitoblar yoshlarni o‘z burchiga sadoqatli, jasur va yovqur bo‘lishga da’vat etishi ta’kidlandi.
Qurolli Kuchlar akademiyasi kutubxonasiga Yozuvchilar uyushmasi tomonidan chop etilgan kitoblar va “Turkiy adabiyot durdonalari”ning yuz jildligi tuhfa qilindi. Shuningdek, o‘zbek kino ustalari tomonidan suratga olingan harbiy-vatanparvarlik mavzusidagi filmlar hamda taniqli rassomlarning yangi asarlari jamlanmasi taqdim etildi.
Anjumanda kino, teatr, adabiyot, tasviriy san’at, noshirlik sohalarining bir guruh faol vakillari O‘zbekiston Respublikasi Mudofaa vazirligining “Yosh avlodni harbiy vatanparvarlik ruhida tarbiyalashdagi faol ishtiroki uchun” ko‘krak nishoni bilan taqdirlandi.
“Mard askarga sovg‘a” turkumidagi to‘plamlarda iste’dodli shoir va yozuvchilarimizning yuksak insoniy fazilatlari, Vatan madhi, el-yurt qadri tarannum etilgan eng sara she’rlari, ta’sirchan hikoyalari jamlangan. Ushbu asarlar nafaqat harbiylarni, balki yuragida yurt tuyg‘usi jo‘sh urgan barcha yoshdagi yurtdoshlarimizni yuksak vatanparvarlikka, jasorat va matonatga, fidoyilikka da’vat etadi. Kitoblardan o‘zbek adabiyotining zabardast namoyandalari, bugungi yosh shoirlarning ijodidan namunalar o‘rin olgan.
Anjumanda taniqli san’atkorlar va harbiylarning badiiy jamoalari ishtirokida konsert dasturi namoyish qilindi, Qutlibeka Rahimboyeva, Salim Ashur, Shodi Otamurod, Shahriyor Shavkat kabi shoirlar to‘plamga kiritilgan she’rlarini o‘qib berdi.
Bir so‘z bilan aytganda, harbiy vatanparvarlik ruhida o‘tgan taqdimot tadbiri ishtirokchilar qalbida shaxt-u shiddat, jasorat va shijoat tuyg‘ularini alangalatdi. Ijodkorlar va harbiy xizmatchilar orasida mustahkamlanib borayotgan bu kabi hamkorliklar yurt tinchligi yo‘lida xizmat qilishi shubhasiz.
Zero, xalq va armiya birdamligi katta qudrat, san’at va adabiyot esa quvvatlantiruvchi kuchga ega. O‘zbekistonda xizmat ko‘rsatgan madaniyat xodimi, o‘zbekning bek so‘zli shoirasi Qutlibeka Rahimboyeva so‘zi bilan aytganda:
Ozod O‘zbekiston, ozod o‘zbeklar,
Har tovshi – bir shunqor ushlab turar tug‘.
Shunqorim, tug‘ingni balandroq tikla,
Dunyoda bundan-da yaxshi unvon yo‘q.
Ma’mura ZOHIDOVA
2024-yil 23-fevral 9-son
ÖZBEK-QOZOQ MADANIY HAMKORLIGI MUSTAHKAMLANMOQDA
Özbek va qozoq xalqlari tili, dini va madaniyati bilan bir-biriga çambarças boğlangan ellardir. Ajdodlarimiz ming yillar davomida yonma-yon yaşab, hayotning quvonç va taşvişlarini, yaxşi-yomon kunlarni birgalikda boşdan keçirib, taqdirdoş bölib kelişgan. Bu qardoşlik keyingi yillarda, ayniqsa, mustahkamlanib, yangiça mazmun va ruh bilan boyib bormoqda. Bu borada Özbekiston Respublikasi Prezidenti Şavkat Mirziyoyev hamda Qozoğiston Respublikasi Prezidenti […]
16.11.2026 | 14:34
64
“BIR ÇORAK ET”
Yaqin-yaqinlargaça xalq tilida, badiiy adabiyotda “Tört qadoq göşt”, “bir çirpit asal”, “ön tanob yer” kabi jumlalar işlatib kelinardi. Hozir esa bular nimani anglatişini deyarli unutib yubordik. Qirq yilça burun “bir aşmuşka çoy”, “tört yumaloq çoy” kabi sözlar savdoda, turmuşda köp işlatilardi. “Aşmuşka” deb eng kiçik çoy qadoği – ellik grammlik, özi kub şaklida bölsa ham, […]
12.11.2026 | 14:31
587
NON VA OŞ ŞAHRI
Yaqinda xorijlik oşnalarni kutib oldim. Uçoq tungi soat uçda qöndi. Ertalab sakkizda “Afrosiyob”da Buxoroga ketişlari kerak. Ölguday çarçaşgan, ramaqijon ahvolda. Özbekona taomilga köra, qönoqlar öziga kelsin deb palovxona sari boşladim. Uç xil oş çaqirdim. Non-çoy, aççiq-çuçuk degandek… Qiziği keyin boşlandi. Mehmonlar piyolaning çetiga ikki marta lab tekkizib, ajablanişdi: – I-ya, qardoş, çoyga şakar solinganmi?– Ha-da! […]
12.11.2026 | 09:27
584



